Target sa Bogo sikop, sa Moalboal nakasibat

CEBU, Philippines - Gisikop sa kapolisan ang 40-anyos nga lalaki sa buy-bust operation nga gipahigayon sa barangay Taytayan, dakbayan sa Bogo pasado ala una sa hapon sa nakalabay nga adlaw.

Ang dinakpan naila nga si Glenn Montecillo alias Sio, ulitawo, nagpuyo sa maong lugar ug nabutang sa target list sa kapolisan sa Bogo gumikan sa pagbaligya og drugas.

Ang deputy chief sa Bogo City Police Station, Sr. Insp. Ildeponso Miranda Jr., ug kaubanan ang nihimo sa pagpangronda gamit ang P200 nga buy-bust money.

Mga gagmay nga pakete sa drugas ang nasakmit sa kapolisan gikan sa suspek ug gituohang halin nga P200.

Samtang  sa lungsod sa Moalboal nakasibat ang usa ka notadong tigpayuhot og drugas sa Lower Lanao sa maong lungsod pasado alas 3 sa nakalabay nga hapon.

Ang nakasibat giila nga si Joel Castillo, hingkod, apan ang duha ka kauban sulod sa balay ang nasikop nga sila si Joseph Pableo, 21 ug Junrel Castillo.

Human nakapalit og duha ka pakete sa gituohang drugas, dali nga nakabantay ang suspek ug nakaambak sa bintana.

Sa pagrikisa sa kapolisan kang  Junrel ilang nakuha ang usa ka .38 revolver nga may duha ka bala lakip sa pito ka gagmay nga pakete sa gituohang drugas.

Gitanggong na sa Moalboal Police ang mga dinakpan samtang padayon pa nga gipangita ang target nga nakasibat. (BANAT NEWS)