CEBU, Philippines – Gibutyag sa abogado sa usa sa mga akusado sa pagpatay kang Atty. Noel Archival nga wala na kini komunikasyon sa iyang kliyente sud na sa duha ka buwan.
Si Atty. Inocencio dela Cerna nagkanayon nga duha na ka buwan nga wala siya’y komunikasyon sa iyang kliyente nga si Senior Inspector Joselito Lerion.
Bisan pa man sa mga kabalaka sa pamilyang Archival nga wala na sa Camp Crame ang tulo ka akusado, nagtuo si Dela Cerna nga nagpabilin sa maong kampo ang mga akusado.
Ang gidestino sa Camp Crame mao sila si Lerion, Senior Superintendent Romualdo Iglesia, ug PO1 Alex Bacani human sila girelibohan sa ilang pwesto sa Regional Highway Patrol Unit-7.
Si Dela Cerna mitug-an sa Banat News nga kun magkaestorya na sila ni Lerion, iyaha kining awhagon nga tahuron ang mando sa korte nga pag-aresto kanila.
Naglaraw siya nga mosang-at og motion for reconsideration diha sa sala ni Judge Maximo Perez kinsa maoy mipagawas og warrant of arrest niadtong Disyembre 11, 2014 batok sa mga akusadong polis.
Matud ni Dela Cerna nga nahinabi niya ang duha ka abogado ni Iglesia ug Bacani ug nagplano usab sila nga moduso og motion for reconsideration.
Gibutyag ni Dela Cerna nga nasurpresa sila sa pagpagawas sa korte og warrant of arrest batok sa ilang mga kliyente. – /EIM) (BANAT NEWS)