Wa na baliki sa kapuyo nagbitik sa liog
CEBU, Philippines – Usa ka 27-anyos nga lalaki ang naghikog tungod kay dili na gustong balikan sa iyang kapuyo diha sa barangay Bonbon, lungsod sa Aloguinsan.
Ang namatay mao si Jose Magtagad Jr., residente sa maong lugar kinsa napalgan sa iyang inahan nga nagbitay na sa pisi sud sa lawak niini.
Matud ni Police Officer 2 Abelardo Biton sa Aloguinsan Police Station nga buot untang makigbalik sa namatay ngadto sa kanhi kapuyo nga si Evon Pañares kinsa bag-o lang niuli gikan nanarbaho sa Manila.
Apan tungod kay giingong manapat ang lalaki, wala na mosugot ang babaye ug gikan niadto namatikdan nga magul-anon na si Magtagad hangtud nga nakit-an kini nga naghikog na.
Samtang nalandig sa tambalanan si Catherine Barion, 35, human kini napusilan sa iyang kapuyo nga si Artemio Tacatani,40, sud sa ilang balay sa Sitio Sudtunggan, Barangay Basak sa dakbayan sa Lapu-Lapu.
Matud sa report nga gihimo sa Lapu-Lapu City Police Office-Homicide Section, nakaangkon og samad pinusilan sa iyang tiil ang biktima human nga giingong napusilan ni Tacatani human sa ilang panaglalis.
Si Tacatani mitahan sa kapolisan ug gi-turnover ang kalibre 38 rebolber nga dunay usa ka basiyo sa tambor niini, wala pa matino kun duna ba kini lisensiya. – /EIM) (BANAT NEWS)
- Latest
