CEBU, Philippines - Ang kadagkoan sa Land Transportation Franchising and Regulatory Board (LTFRB) miawhag sa mga interesado’ng publiko pagtambong sa gitakda nga public hearing kabahin sa gisugyot nga pagpakunhod sa mga pletehan sa public utility vehicles, ilabi na sa PUJ.
Giawhag ni kanhi Cebu City Councilor Augustus Pe Jr. ang kadagkoan sa LTFRB nga ang minimum nga pletehan sa mga PUJ’s ibanan gikan sa P7.50 sa unang lima ka kilometro ngadto na lang sa P7. Gilantaw hinuon nga daku ang kahigayonan nga aprobahan ang petisyon.
Sa kaulohan, gitugot gani ang pagpakunhod og usa ka peso nga minimum nga pletehan sa mga PUJ’s.
Pagka karon, ang mga drayber sa PUJ dagko kaayo’g ganansya sa ilang pagpamasahero kay samtang barato na ang krudo ug gasolina, wala mokunhod ang pletehan.
Ang krudo gibaligya karon sa ‘tag P33 ngadto sa P34 ang matag litro samtang sa gasolina gikan sa P41 ngadto sa P43 ang litro.
Ang mga drayber, dili pa gayud mohatag og sukli mao nga ang ilang kolektahon ‘tag P8 sa minimum nga pletehan. (BANAT NEWS)