CEBU, Philippines - Nakahasol pag-ayo sa mga motorista ang wala humana nga drainage project sa Department of Public Works and Highways (DPWH) nga gitukod nila sa tiilan nga bahin sa Veterans Drive, kana’ng karsada nga patungas paingon sa Marco Polo Hotel.
Taud-taud na nga gihunongan sa DPWH ang proyekto mao nga nakahasol sa mga motorista ang mga nagliundok nga mga bato ug graba nga anaa gibutang daplin sa karsada. Kanunay nga ang mao nga lugar makasinati og grabe nga problema sa trapiko.
Tungod kay aduna may mga bato ug graba nga anaa gibutang daplin sa gibiyaan nga drainage project, ubang sakyanan nga gikan sa ibabaw ug mopaingon sa Lahug, mapugos sa paggamit sa bahin sa karsada nga para niadto’ng motungas paingon sa Busay.
Gitan-aw usab nga tungod kay wala may igo nga gawasanan sa tubig gikan sa gimugna nga drainage system, gituohan nga ang maong proyekto dili makasulbad sa pagbaha diha sa eskena Gorordo Avenue ug Salinas Drive.
Ang karsada nga nahimutang kilid sa Aderan Hotel mahimo na nga sapa kun kusog ang uwan ug ang nakapasamot sa problema kay adunay mga lumolopyo sa ibabaw nga bahin sa Sitio Sun-ok, Lahug nga mopaanod ra sa ilang mga basura sa baha. (BANAT NEWS)