CEBU, Philippines - Nasakpan ang usa ka karton sa kontrabando nga gisuway pagpayuhot sa Cebu Provincial Detention and Rehabilitation Center (CPDRC) niadtong Huwebes sa gabii.
Si Marco Toral, consultant on jail matters sa Kapitolyo, nibutyag nga ang sulod sa karton mao ang unom ka Nubain ampoules, tulo ka paketeng shabu, unom ka botelya sa tubig nga dunay sulod bino, digital weighing scale ug duha ka gagmay nga karton sa tina sa buhok.
Matud ni Toral duna sab sila’y na-recover nga duha ka “hook” diin giingong mao kini ang gamiton sa pagkaw-it sa butang nga kuhaon gikan sa gawas sa selda.
Ang kontrabando gilabay sa lugar nga wala’y nabutang nga CCTV camera.
Ang kontrabado itugyan ngadto sa Guadalupe Police Station.
Nunot niini, si CPDRC warden Romeo Manansala nagkanayon nga magbutang siya og outpost sa gawas diin gilabay ang kontrabando.
Nangayo usab siya og dugang blue guards sa Kapitolyo nunot sa hapit na pagpangretiro sa ubang jail officers. (Brenda D. Batuto/GMR)(BANAT NEWS)