CEBU, Philippines – Gipasakaan na og kaso ang sakop sa Special Weapons and Tactics (SWAT) sa Cebu City Police Office (CCPO) tungod sa pagdala niini sa asawa sa laing polis sa usa ka motel sa North Reclamation Area siyudad sa Mandaue.
Ang bana nga polis nga si Police Officer 1 Mark Anthony Cabahug, sakop sa Tourist Police sa Lapu-Lapu City Police Office misang-at og reklamo ngadto sa Visayas Ombudsman kagahapon batok ni Police Officer 3 Joliver Soque.
Nasayran nga reklamong grave misconduct ug kalapasan sa Napolcom Memorandum Circular 2007-01 kon Uniform Rules ang Procedure sa mga sakop sa Philippine National Police ang giduso ni PO1 Cabahug batok kang PO3 Soque ngadto sa Anti-graft Office.
Kahinumdumang, Miyerkules sa milabay’ng semana dihang gidakop si PO3 Soque ug ang asawa ni PO1 Cabahug nga si Ruby human iyaha silang nasakpan nga nanulod og motel.
Kusganong gihimakak ni Soque ug Ruby nga dunay gihimong dautan sa sud sa motel kay matud pa business meeting ang ilang gihimo.
Matud pa sa tigpamaba sa Visayas Ombudsman Atty. Maria Corazon Naraja, ipaubos pa sa evaluation ang giduso nga reklamo aron pagsuta kun duna kini igong basehan nga himuong full-blown administrative complaint ug kun ipasa ang kaso ngadto sa Ombudsman for Military and Other Law Enforcement Officers (MOLEO). – /EIM) (BANAT NEWS)