CEBU, Philippines – Patay ang usa ka tuig ug 11 ka buwan nga batang lalaki human gitigbas sa makadaghan nga higayon sa iyang ig-agaw diha sa Sitio Sigbit, Barangay Media Once sa dakbayan sa Toledo.
Giila ang maong bata nga si Gilbert Jimenez kinsa magduha ka tuig na unta sa sunod buwan samtang ang gitumbok nga mitigbas kaniya mao si Ernia Jimenez Segara, 22, pulos nagpuyo sa nahisgutang dapit.
Sa imbestigasyon ni Police Officer 3 Alfred Barquin nga nagkaon ang biktima dihang gihatagan kini og pagkaon sa iyaang si Jocelyn apan kalit nga mibutho ang suspek ug sa way igong hinungdan, diretsong gitagod og tigbas ang bata sa makadaghang higayon.
Sumala pa ni Jocelyn sa kapolisan nga nagpangagot ang ngipon ug nagsulirap ang mata sa suspek dihang gitigbas niini ang bata sa ulo, liog bukton ug hapit nang maputol ang iyang kamot.
Dali usab nga mipahigayon og hot pursuit operation ang mga barangay tanod hinungdan sa pagkasikop sa suspek sa Barangay Cantabacco.
Sumala pa ni Barquin nga dihang ilang gipangutana ang suspek daw wa kini sa kaugalingon ug mitubag lang nga susama nga adunay nisulod kaniya nga dautang espiritu, apan miangkon kining tiggamitan og ginadiling drugas.
Ang paryente sa suspek mitug-an usab sa kapolisan nga daan nang walay pagmahal sa mga bata ang suspek.
Nasayran nga ang iyaan lang sa bata ang nagbantay niini sanglit nagtrahaho sa dakbayan sa Sugbo ang inahan sa biktima. – /EIM) (BANAT NEWS)