Citom wala kaayo manakop

CEBU, Philippines - Wala kaayo manakop ang mga traffic enforcers sa mga dakponon nga drayber dinhi sa dakbayan sa Sugbo sa buwan sa Oktubre hinungdan nga ubos ang kantidad sa administrative fines nga ilang nakolekta kun itandi sa Septiyembre karong tuiga.

Kaniadto’ng Septiyembre ang City Traffic Operations Management (CITOM) nakakolekta og P1,780,595 gikan sa multa sa mga nadakpan nga drayber, apan sa Oktubre ang koleksyon miabot lang og P1,519,240.

Hinuon, ang kinatibuk-ang kita sa CITOM sa buwan sa Oktubre miabot og P6,019,287 nga mas taas kun itandi sa P5,933,505 sa Septiyembre.

Bisan og gamay ang koleksyon sa administrative fines kon multa sa mga nadakpang drayber sa buwan sa Oktubre, apan mas taas ang nakolekta sa CITOM sa mao nga buwan kun itandi sa buwan sa Septiyembre.

Ang rason niini mao nga mas taas ang kantidad nga nakolekta sa CITOM gikan sa parking fees. Sa Septiyembre ang CITOM mikolekta lang og kapin sa P2.9 milyones apan sa Oktubre kapin sa P3.2 milyones.

Misaka usab ang kantidad sa clamping gikan sa P375 mil sa Septiyembre ngadto na sa P415 mil pagka Oktubre. Ang Korte Suprema mihukom nga legal ang pag-clamp sa ligid sa mga sakyanan nga masakpan nga ipataka lang pag-parking sa No Parking Area dinhi sa dakbayan.

Sa laing bahin, mikunhod usab ang nakolekta nga multa sa CITOM gikan sa mga tag-iya’g traysikpad nga ilang madakpan. Gikan sa P166 mil kaniadto’ng Septiyembre, ang koleksyon mikunhod sa P158 mil nianang pagka Oktubre. Bisan gani sa kampanya sa anti-jaywalking kon mga tawo nga magpataka’g labang sa karsada mikunhod ‘sab. Gikan sa P171 mil ang koleksyon miabot na lang og P150 mil. (Rene U. Borromeo)

Abusadong drayber midaghan

Misamot kadaghan ang mga drayber nga wala na’y kukahadlok sa paglapas sa balaud nga gilatid sa Transportation and Traffic Code tungod kay wala na’y pagpanakop nga gihimo ang kadagkoan sa Land Transportation Office (LTO). Daghang mga motorista nga ang ilang mga sakyanan naisyuhan na og original plate numbers apan dili tauran og plaka ang atubangan, samtang ang uban tuyoon nila sa pagtaptap og itom nga plastik o bildo ang mga plaka sa ilang sakyanan.

Ang ubang sakop sa CITOM nangatarongan nga dili nila madakop ang mga malapason nga motorista nga wala motuman sa lagda sa Republic Act 4136 tungod kay wala na sila isyuhi og Temporary Operator’s Permit (TOP) sa LTO.

Base sa lagda ang mga drayber masakmitan lang og lisensya kun ang nagdakop kanila moisyu og TOP nga naghatag kanila og pagtugot nga makapadayon sa pag-drive sulod sa tulo ka adlaw gikan sa adlaw nga sila gisakmitan sa lisensiya. Apan ang Cebu City Ordinance 801 nga mao ang Traffic Ordinance sa dakbayan sa Sugbo naghatag usab og gahum sa mga traffic enforcer sa pagdakop sa mga sakyanan nga gitaptapan ang plate numbers, ug kadto’ng dili mopasiga sa ilang mga headlights ug tail lights sa gabii.

Ang LTO Chief nga si Alfonso Tan mipahunong sa pag-deputize og mga sibilyan kay gusto niya nga ang mga sakop sa law enforcement branch sa LTO langkoban ra g’yud sa mga permanent LTO nga kawani.  (BANAT NEWS)