CEBU, Philippines - Gikinahanglan ang representasyon sa kabatan-onan sa mga Local Disaster Risk Reduction Management Council (LDRRMC).
Si Commissioner Jose Sixto “Dingdong” Dantes III sa National Youth Commission (NYC) nipahibawo nga ila karong gipaningkamutan nga ang kabatan-onan may representasyon sa National Disaster Risk Reduction Management Council (NDRRMC).
Ang artista nga si Dantes nitambong sa katapusan sa tulo ka adlaw nga Consultative Conference on Youth Participation on Disaster Preparedness nga gipahigayun kagahapon sa Kapitolyo.
Gipasabot ni Dantes nga buot nila malakip ang kabataan sa mga han-ayon nga solusyon sa mga nahitabong katalagman.
Sa maong consultative conference, ang mga youth leaders mihatag og mga inputs kabahin sa ilang mga sugyot nga maoy basehan sa pagpalabang og resolusyon.
Lakip sa maong kalihukan ang pagpahigayun og disaster workshop ug drills.
Nikabat sa 133 ka batan-on gikan sa Visayas ug Mindanao ang nisalmot sa maong consultative conference.
Si Jaywils Adlawan, 20-anyos, taga San Jose, Tacloban City nipaambit sa ilang nasinati sa bagyong Yolanda.
Matud niya nga usa sa matabang ngadto kanila sa maong conference mao ang “awareness” ug makabaton sila og kaalam kung unsa’y ilang buhaton kung dunay mga katalagman.
Gibati siya og kabalaka sa iyang pamilya tungod kay gipuntariya na sa bagyong Ruby ang ilang lugar.
Dakung uyon si Adlawan sa tinguha sa NYC aron ang tingug sa kabataan madunggan.
Gipasabot ni Adlawan nga dunay mga concerns ang kabataan nga buot makatabang sa komunidad apan dili mapaminaw.
Dugang ni Adlawan nga ang tanan nilang nakat-onan sa conference mapaambit usab nila kini ngadto sa uban. (Brenda D. Batuto/GMR)(BANAT NEWS)