CEBU, Philippines - Mokabat sa 64 ka mga barko ang boluntaryong mikanselar sa ilang biyahe kagahapon ug karong adlawa, gipaabot nga walay bisan usa ka barko ang molawig sa bisan asang dapita sa Kabisay-an tungod sa bagyong Ruby. Si William Melad, Philippine Coast Guard (PCG) Central Visayas District Commander nagkanayon nga ang maong mga barko nagbiyahe nga Ormoc ug Bohol.
Gibutyag ni Melad nga sa mga alas 4:00 sa hapon kagahapon mikabat sa 89 ka mga pasahero ang na-stranded.
Samtang sa dakbayan sa Toledo, napulo ka mga barko ang wala mobiyahe padung sa Negros tungod gihapon sa bagyo. Gikonsiderar na sa PAGASA nga peligro sa tanang matang sa sakyanan sa dagat ang pagbiyahe sa sidlakang bahin sa nasud diin mag-atubang sa dagat Pasipiko.
Storm warning
Gipaubos sa public storm signal number 2 ang Northern Samar, Eastern Samar, Samar, Biliran, Leyte, Southern Leyte, Surigao del Norte lakip ang Siargao Island, Surigao, del Sur ug Dinagat.
Sumala pa sa Facebook account sa Pagasa, nagdala si Ruby og hangin gikan 60 kph hangtud 100 kph nga masinati sud sa 24 hours.
Base sa alas-4 nga weather forecast, ang mata ni Ruby nahimutang 720 km silangang bahin sa Surigao City (10.6°N, 132.0°E). Duna kini maximum sustained winds nga 205 kph duol sa sentro ug may unos nga 240 kph ug nag-irog kini sa kasadpang-amihanangkasadpan sa gipaspason nga 15 kph.
Gipaabot nga karong hapon naa mahimutang si Ruby 360 km sa sidlakang bahin sa Guiuan, Eastern Samar ug sa Sabado sa hapon motugpa kini sa Eastern Samar-Northern Samar area. Ug 30 km kasadpang-habagatang-kasadpan sa Romblon, Romblon.
Gikabalak-an usab nga posibleng adunay masinating storm surge sa mga coastal areas sa Eastern Samar sumala pa sa Pagasa, apan mag-agad kini sa gidak-on sa tubig sa dagat ug sa gikusgon.
Managlahing forecast
Dunay nagkalain-laing pagbanabana ang nagkadaiyang weather agencies sa kalibotan nga nagtutok sa bagyo.
Ang Pagasa, ug ang mga weather forecast sa Japan, South Korea, China, United Kingdom pareho og pagbanabana sa dagan ni Ruby nga moigo kini sa Eastern Samar ug motadlas sa Central Visayas padung sa Western Visayas.
Apan ang Joint Typhoon Warning Center sa Amerika, posibleng mosud sa Bicol Region ang bagyo ug posibleng moigo kini sa Metro Manila hangtud sa adlaw nga Martes. Sagad kanila mikonsiderar na kang Ruby nga usa ka super typhoon. (BANAT NEWS)