Namisita sa uyab gidunggab

CEBU, Philippines – Nanunggab ang 21-anyos nga lalaki sa iyang higala human sa panaglalis sa sitio Sunrise, Gun-ob, dakbayan sa Lapu-Lapu alas 5:15 sa hapon sa niaging adlaw.

Si John Rey Tampus, fourth year high school, ang gitumbok nga nidunggab gamit ang hait nga hinagiban kang Randy Sumalinog, 23-anyos nga taga Hawaiian II, Marigondon.

Base sa inisyal nga imbestigasyon ni PO3 John Carlo Jocutan nasayran nga si Sumalinog kuyog sa iyang higala aron bisitahon ang iyang uyab nga si Joane Jane Pakres.

Samtang naglingkod ang biktima sa iyang motor, kalit giduol ni Tampus ug nagkalalis nga niresulta sa pagpanunggab.

Ang biktima nga nakaangkon og samad dinunggaban sa likod nga bahin sa lawas  nidangop sa Gun-ob Police Station.

Daling gidala sa tambalanan si Sumalinog samtang si Tampus boluntaryong nisurender kang Brendo Inehao, kinsa on-duty nga Barangay Peacekeeping and Safety Officer sa Gun-ob.

Matud sa suspek nga gibaharan siya ni Sumalinog tungod sa gituohang dili maayo nga kinaiya ug mitukmod kaniya nga mobuhat sa krimen. Kasamtangang gibutang sa detention cell ang suspek alang sa giandam nga kasong frustrated homicide. – /GMR) (BANAT NEWS)