Kanhi Neda director konbikto sa sexual harassment

CEBU, Philippines - Ang kanhi regional direktor sa National Economic Development Authority (NEDA) dinhi sa Central Visayas gikonbikto sa Sandiganbayan tungod sa sexual harassment.

Hinuon, P20 mil ra ang gipahamtang nga multa ngadto ni Jose Romeo Escandor isip silot kaniya human makonbikto sa paglapas sa Republic Act 7877.

Usa ka babaye’ng division chief sa NEDA dinhi sa Central Visayas ang mireklamo batok ni Escandor kay matud pa dili na siya makaagwanta sa gihimo sa iyang boss.

Matud pa nga ang paghimo og “immoral advances” batok sa babaye’ng kawani sa NEDA gihimo ni Escandor gikan sa 1999 ngadto sa 2003.

Ang 30 ka pahina nga desisyon nga gisuwat ni Justice Alexander Gesmundo, ang Sandiganbayan miingon nga nasuta g’yud nga sad-an si Escandor sa kaso batok kaniya.

Gihatagan og gibug-aton sa Sandiganbayan ang pamahayag sa complainant nga sa makadaghan nga higayon si Escandor motuyo paggunit sa iyang kamot samtang motambong sila og hearing ug diha pa’y higayon nga gihagkan siya sa aping. Duna ‘say mga higayon nga padad-an og text message ni Escandor ang babaye nga nagpasabot nga naibog siya sama sa “I missed you,” ug manawag nga gusto kini nga aduna sila’y “sexual relations.”

Ang Sandiganbayan wala mohatag og gibug-aton sa mga pagpanghimakak ni Escandor sa gireklamo sa complainant. (BANAT NEWS)