CEBU, Philippines – Gikiha ang usa ka negosyante kinsa giingong namaligya og peke nga Mongol products.
Si Piskal Van Russel Inopiquez nisang-at ngadto sa korte sa kasong kriminal batok kang Nelson Go, tag-iya sa Cebu Prince Marketing.
Matud ni Inopiquez nga dunay igong basehan ang kaso batok ni Go human dunay gihimo nga test-buy operation.
Piyansa nga P10,000 sa matag usa sa duha ka kaso sa kalapasan sa Intellectual Property Code of the Philippines ang girekomendar batok ni Go.
Matud sa Berol Corporation nga ilang nasuta nga nikatap ang peke nga lapis nga Mongol sa kamerkadohan.
Niadtong Abril 2013, ang kompaniya nakadawat og report nga ang Cebu Prince Marketing sa Atillo Building, 97 MC Briones St., Cebu City nga gipanag-iya ni Go namaligya sa maong peke nga mga lapis hinungdan nga gipahigayun ang test-buy operation.
Gihimakak ni Go ang pasangil ug miingon nga dili nila trabaho ang pag-ila kung peke ba o dili ang ilang gipalit nga produkto. – /GMR) (BANAT NEWS)