Pagduda sa kamatayon sa duha ka polis buot klaruhon

CEBU, Philippines – Usa ka fact-finding committee ang girekomendar sa hepe sa Cebu Provincial Police Office (CPPO) ngadto na sa Police Regional Office-7 aron maoy motutok sa pagpusil patay sa duha ka polis sa lungsod sa Moalboal.

Si Senior Superintendent Noel Gillamac ang hepe sa CPPO nga nahinabi sa mga tigbalita miingon  buot nilang masayran ang dugang pang impormasyon bahin sa kaso tungod kay dunay mikwestiyon kun lehitimo o dili ang operasyon.

Matud pa ni Gillamac buot niyang klaruhon ang nanggawas nga estorya nga dunay laing tuyo ang maong mga polis diha sa lugar nga sukwahi sa nanggawas nga report nga anti-drug operation ang nahitabo. Ang hepe sa kapolisan sa maong lungsod nga si Inspector Edgar Labe miinsister nga  armado sila og search warrant pagronda sa drug den ni Michael Aquino, apan samtang nag-imbentaryo sila sa sud, kalit gipamusil diha sa gawas ang nagbantay nga sila si PO3 Fabio Fernandez ug PO1 Alrasid Jimlani, patay ang duha.

Buot usab masusi ni Gillamac kung dunay operational lapses sa habig sa mga polis aron usbon ang kasamtangan nilang pamaagi ug aron mahatagan og hustong kasayuran ang publiko ug mga opisyales aron mapapas na ang mga pagduda sa maong hitabo.

“To avoid any doubts or any insinuations coming from the civilian and to other government officials para ma-satisfy sad sila nga the operation is legitimate,” matud pa ni Gillamac. – /EIM) (BANAT NEWS)