CEBU, Philippines - Malaumon gihapon si Cebu City Vice Mayor Edgardo Labella nga mausab ang hunahuna sa Santo Papa bisan pa duna nay gipagawas nga itinerary niini nga wala maapil ang Sugbo sa iyang duawon sa Enero 15 hangtod 19.
Matud ni Labella, si Pope Francis nailhan na nga “spontaneous” o kalit mag-usab-usab ang hunahuna ug magbuhat og mga lakaw nga wala sa plano.
Ug tungod niini, si Labella miingon nga mangandam gihapon ang siyudad kay basin mausab ang hunahuna sa Santo Papa. Matud niya nga duol ra kaayo ang Sugbo ug ang Leyte ug maka-accommodate ‘sab ang airport sa delegasyon sa Santo Papa.
Matud pa nga angay nang ikalipay sa mga Filipino nga napili ang Pilipinas nga lakip sa duawon ni Santo Papa kay makahatag kini og paglaum sa mga nabiktima sa katalagman.
Tungod kay gusto ‘sab sa bise mayor makakita sa Santo Papa sa personal, plano niya nga kuyogon ang iyang pamilya sa Tacloban o sa Manila.
Matud ni Labella nga napakyas na siya sa pagtan-aw ni Pope John Paul II sa unang pagbisita sa Pilipinas ug dili na niya palabyon kini nga higayon nga makakita kang Pope Francis sunod tuig.
Sa upat ka adlaw nga state ug apostolic visit sa Santo Papa dinhi sa Pilipinas, adunay usa ka adlaw nga gitagana alang sa taga Tacloban City ug sa Palo, Leyte nga maoy nagrabehan sa bagyong Yolanda sa miaging tuig. (BANAT NEWS)