CEBU, Philippines - Ang lima ka mga punoan sa Acacia diha sa dakbayan sa Naga paingon sa dakbayan sa Carcar nga gisugyot sa Movement for Livable Cebu (MLC) nga putlon kay nakaali sa karsada ang nalakip sa special tree cutting permit nga gipasuspenso sa Department of Environment and Natural Resources (DENR).
Matud pa sa hepe sa Provincial Environment and Natural Resources Office (PENRO) nga si Atty. Chad Estella ang maong suspension order gipagawas niadtong bulan sa Agosto human gibabagan sa mga environmentalist lakip sa MLC ang plano.
Apan niining ulahi lang ang MLC misugyot nang ipaputol ang lima ka punoan sa Acacia tungod kay delikado sa mga motorist, apan wala nila apila kadtong mga kahoy nga gideklarar g’yud sa Provincial Disaster Risk Reduction and Management Office nga angay nang putlon.
Sayo niining semanaha, nagkatinubagay sila si Naga City Mayor Valdemar Chiong ug ang environmentalist nga si Padre Roberto Reyes diha sa buhatan sa mayor tungod sa pagputol sa sobra 50 ka punoan sa kahoy diha sa Naga Central School alang sa tukuron nga track oval. (BANAT NEWS)