CEBU, Philippines - Gihan-ay na sa kagamhanan sa dakbayan sa Toledo ang listahan sa mga senior citizens nga makadawat og cash assistance.
Gibutyag ni Konsehal Merly Abad nga may gigahin na nga pundo ubos sa supplemental budget ang kagamhanan alang sa maong katuyoan.
Kapin sa 12 mil ka mga senior citizen sa dakbayan ang makadawat sa maong tabang base sa listahan sa Office of the Senior Citizens Affairs sa Toledo.
Una na nga gibutyag sa kagamhanan ang paghatag og tag P1,000 sa matag senior citizen nga gikatakdang madawat sunod buwan isip pahalipay atol sa Pasko.
Gawas niini gitun-an usab sa kagamhanan nga hatagan og pahalipay ang mga senior citizens nga makaabot og 100 ang panuigon.
Sa pagkakaron, adunay lima ka centenarian sa dakbayan sa Toledo nga posible unya mahatagan og dugang pahalipay kun maaprobahan sa konseho ang paghatag sa maong cash assistance. (BANAT NEWS)