CEBU, Philippines - Gi-turnover kagahapon sa SM Group, pinaagi sa social responsibility arm niini nga SM Cares, ang 200 ka balay ngadto sa mga biktima sa bagyong Yolanda sa dakbayan sa Bogo.
Ang maong mga balay gitukod sa SM Cares Village nga nahimutang sa barangay Polambato sa siyudad sa Bogo.
Ang usa ka ektaryang luna nga gitukuran gidonar sa mga kabanay ni Wenceslao ug Margarita Fernan sa Polambato.
Ang 200 ka “disaster-resilient” nga panimalay tipik lang sa 1,000 nga gisaad nga tukuron sa SM ingon man sa mga business partners niini alang sa mga Yolanda survivors sa lainlaing bahin sa Kabisay-an.
Sa usa ka press statement, ang SM nagkanayon nga gidesinyo ang maong mga balay subay sa Building Code ug gisegurado nga makalahutay bisan og category 5 nga bagyo sama sa Yolanda.
Nitambong sa turnover si Presidential Assistant for Rehabilitation and Recovery nga si kanhi senador Panfilo Lacson, hepe sa United Nations International Strategy for Disaster Reduction nga si Margareta Wahlstrom, Gob. Hilario Davide III ug Bise Gob. Agnes Magpale ug SM Prime President Hans Sy.
“We just felt that we really need to give back. Of course it (Yolanda) is a very sad incident, but it gave us opportunity to really show our care to the people,” matud ni Sy. (BANAT NEWS)