CEBU, Philippines – Natusak sa bala ang 23-anyos nga lalaki samtang sakay sa motorsiklo human pusila sa barangay Bae, Sibonga, pasado alas 5 sa hapon sa niaging adlaw.
Ang biktima naila nga si Jemar Lopez, ulitawo ug nagpuyo sa maong lugar.
Sa imbestigasyon sa kapolisan nasayran nga ang biktima paingon unta mokuha sa iyang igsuon sa Poblacion apan kalit lang gipusil sa wala pa mailhing gunman.
Igo sa nagkalainlaing bahin sa lawas ang naangkon sa biktima nga dali pa unta nga gidala sa tambalanan apan nakabsan sa iyang kinabuhi.
Nakuha sa kapolisan gikan sa namatay ang 10 ka basiyo sa .45 caliber pistol, usa ka slug, sling bag nga dunay sulod nga cellphone, Swiss knife, libreta nga dunay Latin nga suwat, lighter ug usa ka tin foil. Samtang nalandig sa tambalanan ang usa ka lalaki nga gipusil sa iyang silingan sa Purok Saging, Gun-ob, dakbayan sa Lapu-Lapu sa niaging Sabado sa buntag.
Ang biktima mao si Rowell Capin, 25, samtang ang suspek mao si Diony Blanco, usa ka pintor. Si Jose Bascones, usa ka advertising supervisor, nga nakakita sa panghitabo ang daling nitawag og polis apan nakaikyas ang suspek.
Nakaangkon og samad pinusilan si Capin sa wala’ng bahin sa iyang lawas ug sa iyang likod.
Gidala ang biktima sa Lapu-Lapu City District Hospital ug gibalhin sa Vicente Sotto Memorial Medical Center. (BANAT NEWS)