CEBU, Philippines – Tulo ka mga tawo ang nadakpan sa managlahing anti-illegal drugs operations sa dakbayan sa Mandaue ug Bogo.
Nadakpan sa kapolisan ang managkapuyo nga sila si Elmo Pegarido Jr., 36, ug Baby Ilustrisimo, 35, diha sa Sitio Tikyan, Barangay Banilad, sa dakbayan sa Mandaue.
Ang duha nasakmitan og usa ka medium size nga paketeng shabu, duha ka gagmay nga pakete niini, ug drug paraphernalia.
Si Senior Police Officer 4 Fernando Gabutero sa Presinto 4 mibutyag nga ang operasyon gihimo pinasikad sa search warrant nga giisyu ni RTC Branch 56 Judge Teresita Galanida sa Mandaue City. Ang operasyon gipangulohan ni Senior Inspector Philip Silva ug mga sakop.
Sa laing operasyon, nadakpan sa buy-bust operation ang usa ka Albert Sestoso,32, residente sa Barangay Gairan, sa Dakbayan sa Bogo.
Si Police Officer 2 Alexander Ancao Jr. sa Bogo City Police Station mibutyag nga ang duha naapil sa drug watch list.
Usa ka poseur buyer ang mipalit og balor P200 nga shabu sa suspek ug dihang nahuman ang transaksyon gidakop kini dayon.
Way laing nakuhang ebidensya kaniya gawas lang sa marked money, usa ka paketeng shabu ug P400 cash nga gidudahang halin sa illegal drugs.
Ang tulo gikatakdang pasakaan og kaso karong adlawa. – /EIM) (BANAT NEWS)