CEBU, Philippines – Dugang pagtuon ang ipahigayun sa ordinansahon ni Konsehal Roberto Cabarubias kabahin sa pagdili sa paggamit og mga saba kaayo nga tambutso sa sakyanan sa dakbayan sa Sugbo. Ang ordinansahon mag-usab sa City Ordinance No. 465 nga napasar niadto pa’ng 1964 nga nagmando sa pagpabutang og tambutso sa mga sakyanan aron dili saba.
Ang makalapas sa maong ordinansa makabayad og multa nga P20 o pagkapriso sulod sa 10 ka adlaw. Gipasabot ni Cabarubias nga sa karon ang mga sakyanan tuyoon pag-usab ang tambutso nga moresulta sa ka saba.
Mas bug-at nga silot ang nalatid sa ordinasahon diin sa unang kalapasan makabayad og P500 isip administrative penalty; P1,000 sa ikaduha; P3,000 sa ikatulo ug P5,000 o pagkapriso nga dili molapas sa tulo ka buwan kung kanunay na’ng gihimo ang samang kalapasan. (BANAT NEWS)