CEBU, Philippines - Gibansay sa International Criminal Police Organization (INTERPOL) ang mga sakop sa Bureau of Fire Protection-7 batok sa terorismo.
Kini ang labing una nga gihimo sa Sugbo sumala pa ni Ian Rotsey sa INTERPOL kinsa mao’y nangulo sa kalihukan nga gipahigayun sa hawanan sa Camp Sergio Osmeña Sr. Kapolisan sa Malaysia ug Indonesia ang misaksi usab sa simulation exercise.
Matud ni Rotsey nga kabahin sa reglamento sa ilang ahensiya nga gitawag og “Counter Terrorism South East Asia Program” ang maong training.
Ang hepe sa Regional Intelligence Division (RID) sa Police Regional Office-7 nga si Sr. Supt. Paul Labra mipasabot nga ang kalihukan lakip sa ilang pagpangandam sa umaabot nga Asia-Pacific Economic Conference nga himoon sa Sugbo sunod tuig.
Hinuon matud ni Labra nga wala sila’y nakuha nga impormasyon labot sa hulga sa terorismo sa Sugbo. (Jojo C. Ugdol/GMR)(BANAT NEWS)