CEBU, Philippines - Gitigum sa kapolisan ang mga travel agencies sa Sugbo labot sa mga nagsingabot nga holidays sugod karon hangtud sa Pasko ug Bag-ong Tuig.
Tuyo niini nga dili mabiktima ang mga travel agencies sa mga dautang elemento sama sa mga tulisan.
Daku ang pagtuo ni Cebu City Police Office Director Noli Romana nga usa sa target sa mga tulisan ang mga travel agencies.
Tinguha sa kapolisan nga matudloan ang mga kawani sa mga travel agencies sa angayan nilang himuon sa higayun nga adunay katingalahan og lihok nga mosulod sa ilang buhatan.
Ang pangulo sa Cebu Association of Tour Operators, Alice Queblatin, nipadayag sa kahadlok sa mga pagpanulis karon.
Gumikan sa maong tigum, nakakuha sila og mga ideya sa mga angayang buhaton sa higayun nga adunay mga mosuway pagbiktima kanila.
Dili mominus 37 ka travel agencies sa dakbayan sa Sugbo, Mandaue ug Lapu-Lapu nga sakop sa CATO. (Decemay P. Padilla/GMR)(BANAT NEWS)