CEBU, Philippines - Duha ka polis ug usa ka non-uniform personnel (NUP) nga nadestino sa Police Regional Office-7 ang pasakaan og kasong grave misconduct human napaubos sa pre-charge evaluation sa mga pasangil nga ilang gi-atubang.
Gibutyag ni Sr. Supt. Rey Lyndon Lawas, hepe sa Regional Investigation Detection and Management Division-7, nga ang duha ka polis naglakip sa usa ka babaye nga nalambigit sa pagpangawkaw sa pondo alang sa bagyong Yolanda ug ang usa ka polis nga nalambigit sa pagpangayo og salapi aron mapadali ang pagpabalhin sa usa ka lugar. Samtang ang NUP nga naapil sa kaso nadestino sa record section human gireklamo nga nangayo og tag P60 o P100 kun dunay mga polis nga mokuha og service record aron mapadali.
Kasagaran sa mga nabiktima sa maong NUP mga polis gikan sa probinsiya nga magdali aron makuha ang ilang service record alang sa ilang katuyoan.
Samtang ang hepe sa Fuente Police nga si Chief Insp. Wildemar Tiu patubagon sa RIDMD-7 labot sa giingong pagdala og armas sa usa ka field training police (FTP) nga nasikop sa Mobile Patrol Group nga hubog ug nani-on og armas. (BANAT NEWS)