CSBT nangandam na sa kalag-kalag

CEBU, Philippines - Nagsugod na sa pagpangandam ang Cebu South Bus Terminal alang sa pagdaghan sa pasahero karon umaabot nga adlaw sa mga minatay.

Matud ni Eddie Dusaban Sr., ang acting operations manager sa CSBT nga gitangtang na ang mga glass windows sa passenger lounge sa terminal aron dili alimuot sanglit guba na man ang mga air-condition units niini. “Nagplano man ang Capitol nga ilisan ni. Pero for the meantime, aron ang mga pasahero nga manguli karong kalag-kalag di alimootan, mao among gitangtang, open-air na siya,” sigon ni Dusaban. Aduna na ‘sab gibutang nga railings alang sa mga pasahero ug mga priority lanes alang sa mga tigulang, mabdos ug katong adunay dala nga mga bata, ug mga person with disabilities.

Gipaabot sa mga nagdumala sa terminal nga modaghan ang mga pasahero sugod Oktubre 28 hangtod sa Nobiyembre 2.

Nagkanayon si Dusaban nga posible usab adunay pagkuwang sa mga bus nianang mga adlawa.

Hinuon, gipasalig sa terminal nga adunay dugang pang bus ang mobiyahe kun gikinahanglan. Gihangyo usab niya ang Kapitolyo nga ipagamit ang mga Suroy-Suroy sa Sugbo nga mga bus aron sa pagpasakay sa uban pang pasahero nga libre.

Mihangyo na ang CSBT sa Kapitolyo sa pagbutang og dugang mga blue guards ug Civil Security Unit, kapolisan, K9 units, alang sa crowd control ug pagtan-aw sa sulod sa terminal. Gipahimangnoan ni Dusaban ang mga pasahero nga kanunay’ng magbinantayon sa ilang mga butang sulod ug gawas sa terminal.  (BANAT NEWS)