CEBU, Philippines - Nagkaligo sa kaugalingong dugo ang usa ka 28-anyos nga lalaki human nabulit sa pinusilan diha sa barangay Sto Niño dakbayan sa Toledo.
Ang namatay giila nga si Gary Ilumino, 28, residente sa nahisgutang lugar kinsa nagbuy-od na sa dalan human gipusil og 11 ka higayon sa wala ilhing tawo.
Matud ni Senior Police Officer 3 Henry Acosta ang Toledo City Police Station investigator, naglakaw ang biktima nianang tungora dihang niabot ang usa ka lalaki sakay og motorsiklong pula ug diretsong nipusil sa biktima.
Narekober sa crime scene ang 11 ka basiyo sa bala sa kalibre .45 nga armas ug siyam niini miigo tanan sa lawas sa biktima nga maoy nakaingon sa iyang kamatayon.
Nakuha usab ang usa ka cellular phone ug makita usab nga adunay kwarta ibabaw sa lawas sa biktima nga tag P20 nga papel ug sensilyo.
Gitan-aw karon ang anggulo nga posibleng may kalambigitan sa drugas ang maong pagpamusil. (BANAT NEWS)