Manindahay sa Tabunok nabalaka momahal ang abang

CEBU, Philippines – Supak ang mga manindahay sa Tabunok Public Market nga mohuwam og P350 milyones ang kagamhanan sa pagpatukod sa bag-ong merkado. Kini gumikan sa kahadlok nga momahal ang abang sa mga stalls.

Gipadayag sa mga manindahay ang ilang sentimento atol sa public hearing sa katukuran sa bag-ong Tabunok Public Market kagahapon.

Matud sa pangulo sa Tabunok Public Market Vendors Association nga si Sherwin Echavez nga daku ra kaayo ang P350 milyones nga ipatukod sa merkado.

Apan si Bise Mayor Romeo Villarante miingon nga dili angay mahadlok ang mga tindera tungod kay naay kapasidad ang dakbayan sa Talisay sa pagbayad sa utang.

Gidugang ni Villarante nga tungod sa kadaku sa Tabunok Public Market nanginahanglan kini og daku nga budget.

Gipasabot ni Villarante nga dili ra gamiton ang P350 milyones sa building apan apil na niini ang parking area. Ang merkado may gidak-on nga 1.3 ektarya apil na ang parking lot sa mga traysikol ug public utility jeepneys (PUJ).

Usa usab sa ilang sentimento mao nga mahadlok ang mga tindera nga dili unya sila’ng tanan maka-okupar sa bag-ong tindahan nga tukuron.

Apan gipasalig ni Villarante nga may fair distribution sa mga stalls ug gani nagsugod na ang ilang survey sa mga tindera nga maka-okupar sa bag-ong merkado nga tukuron.

Giuyonan na sa konseho ang hangyo sa mga tindera nga ibutang sa ground floor ang wet market.

Giplanohan nga ibutang sa lower ground floor ang parking area, sa upper ground floor ang wet market, sa second floor ang dry goods ug entertainment ang third floor. Apan nisaka ang tensyon sa public hearing dihang si Paul Labalan, usa sa tigpamaba sa kahugpungan sa mga tindera, nipadayag nga angay lang i-renovate ug i-retrofit ang daang merkado ug di na kinahanglan bag-ohon.

Apan matud ni Talisay City Mayor Johnny De los Reyes nga kinahanglan na gyud usbon ang merkado tungod kay apil sa pag-usab niini ang pagbutang og mga drainage aron malikayan ang baha sa maong lugar.

Si Konsehal Val Ylanan miingon nga kung matuman na ang bag-ong merkado, momenus na usab ang traffic sa maong lugar tungod kay mahan-ay na man ang mga sakyanan.

Giklaro ni Villarante sa pagsugod pa lang sa public hearing nga dili tanang gusto sa mga tindera ang matuman sa maong proyekto tungod kay magbase kini sa feasibility study nga himuon. Si Echavez sa iyang bahin miingon nga positibo sila nga iapil gihapon sila sa plano ug nagpaabot na lang sila sa resulta sa feasibility study. – /GMR) (BANAT NEWS)