CEBU, Philippines - Ang mga lumolupyo sa unom ka hektareya nga relocation site sa dakbayan sa Mandaue nga nahimutang sa Barangay Paknaan makadawat karong adlawa og mga sinelas.
Si Mandaue City Councilor Emmarie “Lollipop” Ouano-Dizon ug Board Member Thadeo Ouano maoy mangulo pagpanghatag niini ngadto sa mga lumolupyo ubos sa tema nga “Matag Lakang Mo, Kauban Mo Ako.”
Gawas sa pagpanghatag og mga sinelas ngadto sa 400 kapin ka pamilya nga nagpuyo sa maong dapit maoy ilang pagahimoon ang pagpasiugda usab og feeding activity sa maong lugar.
Si Konsehal Ouano-Dizon miingon nga nagkinahanglan og pag-ayuda ang maong mga lumolupyo sanglit ang pipila kanila bag-o pa lang nga namalhin sa maong lugar.
Apil sa bag-ong namalhin ang mga pamilya nga gikan sa Sitio Mahayag, Barangay Subangdaku nga gidemolis ang ilang mga panimalay daplin sa Mahiga Creek.
Hatagan sila og “ready to eat” nga pagkaon bali’g tulo ka adlaw sa mga sakop sa City Social Welfare and Development (CSWD) ug ang magpasiugda sa medical mission mao ang kahugpongan sa mga kooperatiba sa Mandaue. - /RUB (BANAT NEWS)