CEBU, Philippines - Nasikop sa kapolisan sa lungsod sa Borbon ang upat ka lalaki atol sa buy-bust operation sa barangay Cadaruhan niadtong Martes sa gabii.
Target sa kapolisan ang usa ka Christopher Pogado, 42, ulitawo, kinsa nabutang sa watchlist gumikan sa pagpamaligya og drugas.
Gawas ni Pogado, sikop sab ang lain pa’ng tulo ka lalaki nga didto sa balay sa dinakpan nga naila nga sila si Jonathan Cantal, 38, minyo; Roy Taylaran, 38, ulitawo; ug Jerome Lunday, 26, ulitawo nga pulos nagpuyo sa maong lugar.
Matud ni PO1 Raffy Tejares, sakop sa alert team sa Borbon Police nga nahinabi sa Banat News, nga taud-taud na nilang gipanid-an ang ilegal nga kalihukan ni Pogado.
Nakuha sa posesyon ni Pogado ang 18 ka gagmay’ng pakete nga gituohang drugas, timbangan ug mga drug paraphernalia. Samtang duha ka gikatahapang pushers ang nadakpan ug usa ang nakaeskapo sa buy-bust operation sa sitio Tabunok, Cotcot, Liloan alas 8 pasado sa niaging gabii.
Si PO3 Jesson Gayo sa Liloan Police Station miila sa nadakpan nga si Archer Tundag, 25; Felizardo Montilla Jr., 20 ug ang naka-eskapo mao si Chona Lucero, pulos nagpuyo sa maong dapit.
Si Gayo miingon nga ang nakaeskapo nga si Lucero ang gisugo sa mga dinakpan sa pagtunol og shabu sa ilang poseur buyer nga mao usab ang unang nakamatikod sa mga polis hinungdan nga mikaratil og dagan pahilayo. Si Tundag ug Montilla nga nakalitan sa kalit nga pagdagan ni Lucero daw wala makalihok sa ilang gilingkuran hinungdan nga dali kining gisignit ug gipusasan. (BANAT NEWS)