CEBU, Philippines – Patay ang 30-anyos nga lalaki human dunggaba sa iyang kauban kinsa giingong gibugalbugalan sa biktima sa isla nga barangay sa Carnaza, lungsod sa Daanbantayan alas 12:30 sa udto niadtong Domingo.
Ang biktima naila nga si Jerry Mercado, ulitawo, lumad nga taga Purok San Pedro, Cabanglasan, Malaybalay, Bukidnon.
Ang suspek naila nga si Dexter Bangasaw, 35, minyo, lumad usab nga taga Purok San Pedro, Kimayasan, Cagayan de Oro City.
Matud ni PO3 Raymond Pepito, imbestigador sa Daanbantayan Police, nga ang suspek nipasangil nga kanunay lang kini nga daugdaugon sa biktima.
Ang biktima ug ang suspek kauban nga nagtrabaho sa usa ka pangisdaan sa maong lugar.
Sumala pa ni Pepito nga igo lang naglingkod ang suspek sa usa ka sakyanan samtang nag-inom ang biktima kauban ang iyang mga kauban ug kalit lang kini nga miduol sa biktima kay nangayo og isda. Sigun sa suspek nga wala siya tagai og isda ug nagkalalis ang duha hangtud mikuha og kutsilyo ang suspek dayon dunggab sa biktima igo sa dughan.
Dali pa unta nga gisakay sa pumpboat ang biktima aron dalhon sa tambalanan sa dakbayan sa Bogo apan nakabsan gyud kini sa iyang kinabuhi pag-abot sa Cebu Provincial Hospital.
Samtang ang mga polis sa Bogo gipahibalo nga paingon sa ilang lugar ang suspek ug dali nga gisikop sa kapolisan ug gitugyan sa Daanbantayan Police Station diin siya gitanggong ug gikatakdang pasakaan og kaso karong adlawa. -/GMR) (BANAT NEWS)