CEBU, Philippines – Nasikop sa City Intelligence Branch sa Cebu City Police Office ang usa ka babaye nga level 2 drug pusher, lakip na ang iyang bana nga kawani sa Cebu City Hall ug ang iyang umagad, human sa usa ka buy-bust operation ang gilusad sa kapulisan, sa Sitio San Vicente, Barangay Bulacao ning dakbayan.
Ang mga nasikop naila nga sila si Fe Moneño Badayos, alyas Perot, Edward Badayos, drayber sa garbage truck sa Cebu City Hall, ug ilang son- in- law nga si Peter Bacalan, 18, nga pulos nagpuyo sa maong lugar.
Matud pa ni Superintendent Romeo Santander ang hepe sa City Intelligence Branch sa Cebu City Police Office nga nahinabi sa Banat News dunay mi-text kanila ug ingon man suwat bahin sa pagpamaligya og shabu ni Perot.
Usa ka buy-bust operation dayon ang gihimo sa kapulisan nga miresulta sa pagkasikop sa suspek, kauban ang iyang bana ug umagad. Nakuha sa kapulisan ang 34 ka gagmay nga pakete sa drugas nga dunay kantidad kapin 10 mil pesos, og P4,100 nga gituohang kinitaan niini sa ilegal nga drugas.
Samtang sa laing operasyon, nakaikyas ang usa ka gipasanginlang notadong pusher sa Sitio SYMWA, Barangay Day-as nga si Richard Parame.
Duha ka medium size nga gituohang drugas, usa ka gamay nga pakete, usa ka .38 revolver, tulo ka mga bala ug mga drug paraphernalia ang nasakmit sa balay niini. -/EIM) (BANAT NEWS)