CEBU, Philippines – Usa na ‘sab ka pulis ang nabutang karon sa kontrobersiya human nga nakapusil og usa ka 28- anyos nga lalaki diha sa A.Lopez, Barangay Labangon, alas 7:30 sa gabii niadtong Sabado.
Si Police Officer 2 Celso Colita, 30, nadestino sa Guadalupe Police Station natanggong karon sa Punta Princesa Police Station human kini nakapusil sa usa ka Ric Jun Macani, taga Katipunan Street, Labangon.Si Macani nasamdan sa liog ug kamot human kini gipusil makatulo ka higayon sa maong pulis. Matud pa ni Police Officer 1 Michael Angelo Singson sa Homicide Section sa Cebu City Police Office nga nahinabi sa Banat News, si Colita buot lang untang makig-estorya kang Macani kabahin sa giingong pagpanghinol niini sa pribadong parte sa lawas sa iyang manghod nga babaye. Sigun pa ni Singson base sa alegasyon ni Colita, si Macani pa maoy nasuko ug agresibo nga miduol kaniya hinungdan nga iya kining gipusil. Nakadagan ang biktima ug nakasakay og taxi ug padung sa tambabalan. Nakuha kaniya ang snub nose .38 revolver nga dunay duha ka bala. Padayon pa nga giatiman sa tambalanan ang biktima human matud pa miungot ang bala sa liog niini. -/EIM) (BANAT NEWS)