CEBU, Philippines - Makagamit na ang dakbayan sa Sugbo sa iyang calamity budget aron tabangan ang mga nabiktima sa sunog sa Barangay Luz kaniadto’ng Martes sa hapon. Gideklarar kagahapon sa konseho nga ang Barangay Luz ubos na sa State of Calamity aron ang calamity budget sa dakbayan mahimo na nga gamiton sa pagtabang sa nasunogan.
Ang problema mao nga P7 milyones na lang ang nahabilin sa quick response funds diha sa calamity budget. Duna pa hinuo’y laing kuwarta sa calamity preparedness funds. Ang Sitio Abellana, Santo Niño ug Santa Cruz sa nahisgutang barangay maoy naapektohan sa nahisgutang sunog.
Si Bise Mayor Edgardo Labella mibutyag nga ang maong mga sitio apil kini sa 93-1 nga luna nga gipanag-iya sa Kapitolyo.
Subay niini, si DSWS chief Ester Concha mibutyag nga 250 ka pamilya ang naapektohan sa sunog nga naglangkob sa kapin sa 1,000 ka indibidwal diha nga 128 ka balay ang nangasunog.
Matud ni Concha nga P10,000 ang madawat nga hinabang sa tag-iya sa balay nga naugdaw sa sunog ug P5,000 sa partially damaged. (BANAT NEWS)