CEBU, Philippines - Duha ang patay samtang usa ang nangaangol sa managlahing insidente sa pagpamusil sa Metro Cebu sa miaging gabii ug kagahapon sa kaadlawon.
Kagahapon sa kaadlawon, usa ka construction worker ang gipusil patay sa duha ka lalaki sa may Ermita Proper , Barangay Ermita sa dakbayan sa Sugbo pasado ala-una kagahapon sa kaadlawon.
Ang namatay naila nga si Joselito Seseban, 31, molupyo sa nahisgotan nga lugar. Ang mga suspek giila sa kapolisan nga sila si Levi Planas, 19, ug Wendell Dominguez, 18, nga mga molupyo sa nahisgotan nga lugar.
Base sa pasiunang imbestigasyon sa Homicide Section sa Cebu City Police Office nga nagbarog ang biktima kilid sa dalan dihang gipusil siya sa duha ka lalaki.
Naigo sa iyang ulo ug lawas ang biktima nga maoy hinungdan sa iyang kamatayon. Gidala pa unta sa Cebu City Medical Center (CCMC) ang biktima apan gideklarar na kini nga dead on arrival ug daling misibat ang duha human nga gipusil nila ang biktima.
Matud pa ni SPO4 Rey Cuyos sa Homicide, nga wa pa nila matino ang motibo sa duha sa pagpamusil sa biktima ug sa background niini, samtang padayon pa nila nga gipangita ang mga suspek. (BANAT NEWS)