CEBU, Philippines - Gikombikto ni Municipal Trial Court in Cities (MTCC) Judge Oscar Andrino sa Branch 5 ang usa ka drayber sa PUJ tungod sa kalapasan Traffic Code sa dakbayan sa Sugbo.
Si Jesus Sindo Cabaron, taga Palanas, Alcantara, ang gihukmang mabilanggo sulod sa unom ka buwan.
Niadtong Marso 5, 2012, si Cabaron gisikop tungod kay misulod kini sa dalan nga dunay “No Entry” sign sa F. Llamas.
Subay niini, si Atty. Rafael Yap, executive director sa City Traffic Operation Management (CITOM), nagkanayon nga ang desisyon sa korte nagpakita sa ngipon sa balaud.
Giawhag ni Yap ang mga PUJ operators ug mga drayber nga dili ibaliwala ang citation ticket nga basehan sa pagpasaka sa kaso.
Gibutyag ni Yap nga mokabat sa P64,000 ang tanang pending violation ni Cabaron ug kung dili niya kini ma-settle posibleng masugamak na usab kini og lain pa’ng kaso.
Si Yap nanghinaut nga sa maong kalamboan ang mga pribado ug publikong motorista ug pedestrian makasabot nga ang CITOM seryoso sa ilang pag-implementar sa balaud sa trapiko.
Giawhag usab ni Yap ang mga transport operators sa Sugbo sa pagpahimangno sa ilang mga drayber sa pag-settle sa mga obligasyon niini ngadto sa CITOM.
Dugang niini, si Yap mibutyag nga ang CITOM sa milabay’ng buwan nakaduso na og 72 ka affidavit of desistance tungod kay ang mga drayber nga gipasakaan na unta og kaso miadto sa ilang buhatan ug mi-settle sa ilang mga obligasyon. Si Cabaron kinsa nakapiyansa dihang napasakaan og kaso ang gipangita pa karon. (Brenda D. Batuto/GMR)(BANAT NEWS)