CEBU, Philippines – Natabtab ang walang nawong sa usa ka lalaki nga gitigbas sa gikainom niining silingan sa sitio Lib-og, Guadalupe, dakbayan sa Bogo niadtong Martes sa gabii.
Si SPO1 Israel Velez sa Bogo City Police Station miila sa biktima nga si Danilo Friaz, 39, minyo ug ang suspek mao si Noli Pedong, 38, pulos nagpuyo sa maong dapit.
Matud ni Velez nga ilang nasayran nga sayo pa sa hapon sa maong adlaw nag-inom ang duha sa usa ka tindahan sa maong lugar. Dihang nangahubog, kalit lang nagkalalis nga wala’y igong hinungdan ug ilang gituohan nga gumikan lang gyud sa ilang kahubog.
Dugang ni Velez nga ang suspek nga wala makaagwanta sa iyang kasuko ang daling nilanit sa gitakin nga sundang nga may 10 pulgadas ang gitas-on ug gitigbas ang biktima usa ka higayon sa walang bahin sa iyang nawong. Daling gihatud sa iyang sakop sa pamilya sa Bogo Provincial Hospital ang biktima apan gibalhin sa Vicente Sotto Memorial Medical Center sa dakbayan sa Sugbo.
Si Velez miingon nga ang suspek nga nahuwasan na sa iyang kahubog ang nitahan sa ilang barangay kapitan nga si Cerilo Cabahug. Ang suspek gitugyan sa kapolisan sa dakbayan sa Bogo uban sa sundang nga gigamit sa pagtigbas aron pasakaan og kasong frustrated homicide. -/GMR) (BANAT NEWS)