CEBU, Philippines – Andam mohatag og psychological intervention ang Department of Social Welfare and Development (DSWD-7) sa mga ginikanan niadtong puya nga giingong nalubag ang liog ug namatay dihang gipahimugso sa usa ka tambalanan sa dakbayan sa Sugbo.
Matud ni Leah Quintana, regional public information officer sa DSWD-7, nga makig-alayon sila sa kagamhanan sa dakbayan sa Sugbo aron ipaubos sa stress debriefing ang mga ginikanan sa bata.
Nasayran nga nidangop sa buhatan ni Cebu City Mayor Michael Rama ang ginikanan ug pipila ka kabanay sa bag-ong gihimugso nga bata kinsa giingong gipugos sa doktor hinungdan nga namatay.
Si Rama nipadayag nga dili siya motugot nga dunay malpractice sa doktor nga moresulta sa kadaut sa pasyente. Gitugyan hinuon sa mayor ngadto sa City Legal Office ang reklamo sa ginikanan.
Samtang ang DSWD-7 nabalaka tungod sa sunod-sunod nga panghitabo nga naglambigit sa mga bata diha sa tambalanan. -/GMR) (BANAT NEWS)