CEBU, Philippines – Laing mga ahente sa sigarilyo ang nabiktima na usab sa duha ka armadong lalaki nga nagsakay og motorsiklo sa Sitio Landing, Barangay Catarman, Lungsod sa Liloan niadtong Domingo.
Ang mga biktima mao sila si Danilo Pepito, 28, ug Greg Mehoy, pulos taga Barangay Tipolo, dakbayan sa Mandaue ug mga kawani sa Fortune Tobacco nga nagbase sa Dakbayan sa Sugbo.
Si PO1 Eric Pintoy sa Liloan Police Station miingon nga gikan pa nga nangolekta ang mga biktima ug dihang padulong na unta manakay sa ilang van dihang kalit silang gitionan og armas sa duha ka mga lalaki ug mideklarar og tulis.
Gikuha sa duha ang belt bag ni Pepito nga gisudlan og P21,000 nga cash ug nanakay sa gi-parking nga motorsiklo ug nangikyas.
Ang pipila ka tindera sa maong dapit nga ilang gisukitsukit miingon nga wala sila makakita sa nahitabong pagpanulis apan ilang gipadayag nga nakasigpat sila og duha ka tawo nga nagsakay og motorsiklo nga mihunong duol sa nag-parking nga delivery ban sa mga biktima.
Mao na kini ang ikatulong higayon nga dunay mga ahente sa sigarilyo ang gitulis sud sa duha ka bulan. Ang usa nahitabo sa miaging buwan diha gihapon sa maong lungsod ug ang duha niadtong miaging semana sa siyudad sa Bogo. -/EIM) (BANAT NEWS)