CEBU, Philippines – Gihimakak sa British National nga gipadakop siya ni Sta. Fe Mayor Jose Esgana tungod sa pagkoral sa airstrip sa Isla sa Bantayan ug ni-tresspass siya sa luna sa airport.
Matud sa langyaw nga si Christopher Paul Alexander iya nga giabangan ang luna ug gani lakip siya mitugot nga mihimo og public-private partnership alang sa operasyon sa airport diin magamit ang maong luna.
Wala kapugngi sa Briton ang pagpadayag sa iyang pagkadismaya human gipadakop sa mayor niadtong Sabado samtang iyang gikoral ang luna nga kabahin sa himuong airport sa Isla sa Bantayan. Matud sa langyaw nga wala siya pahibaw-a sa rason kun nganong gidakop ug direkta siya nga gibalhog sa prisohan sa mga mirespondeng mga polis.
Sumala pa nga gisultihan siya sa mayor nga gipanag-iya sa Kapitolyo ang maong luna ug wala siya’y katungod sa pagkoral niini.
Apan matud pa sa langyaw iyaha lang giilisan ang kaniadto koral nga naguba sa bagyong Yolanda. Ang tinuod nga tag-iya sa luna nga gi-abangan ni Alexander miingon nga kompleto ang iyang gihuptan nga papeles pagmatuod nga ila ang luna ug dili iya sa Provincial Government.
Gitug-an sa tag-iya nga si David Masaganda nga ang ilang luna nga 758-B lapas lang sa lot 758-A nga maoy gipanag-iya sa Kapitolyo apan managlahi ang maong yuta.
Matud ni Masaganda nga wala niya gibaligya ang maong luna kay igo lang kini nilang gipaabangan kang Alexander hinungdan nga duna kini katungod sa pagkoral sa maong luna.
Gikatahong nagplano karon ang Briton pagkiha kang Esgana ug sa mga pulis sa Sta. Fe tungod sa pag-detain kaniya nga walay igong rason.
Ang abogado ni Alexander nga si Loreto Durano, miingon ilegal ang gihimo sa mga polis ug ni Esgana. -/EIM) (BANAT NEWS)