CEBU, Philippines - Usa ka pasaheroang pumpboat gikan sa Pasil, Cebu City nga padung sa Getafe, Bohol ang nalunod kagahapon diha sa Lawis Ledge sa habig sa lungsod sa Cordova human gihapak sa dagkong bawod.
Matud pa ni Philippine Coast Guard District Central Visayas Chief, Commodore William Melad ang maong pumpboat nga Clarin Cruiser gidala ni Raul Alipuyo ug gipanag-iya ni Fulgencia Cellan nga taga Clarin, Bohol.
Ang pumpboat adunay 47 ka mga pasahero ug pito ka crew. Giingong nahitabo ang pagkalunod alas 3:20 sa hapon kagahapon hinungdan nga mipadala og duha ka rubber boats ang Philippine Navy. Samtang si Commodore Ronald Jose Mercado sa Philippine Navy mibutyag nga ang unang batch sa mga survivors nga 17 ka buok gidala na sa NAVFORCEN gymnasium ug atol ning pagsulat sa balita duna pay gipaabot nga usa ka batch.
Ang navy mipadala og duha ka team nga gilangkoban og 18 ka rescuers. Base sa impormasyon gikan ni Police Officer Two Vilma Degamo sa Cordova Police Station ang naluwas 34 ka hamtong nga lalaki, 17 ka hamtong nga babaye ug pito ka bata. Ang Cordova social services mao nay moatiman sa mga survivors.(Jessa Marie Agua/EIM)(BANAT NEWS)