CEBU, Philippines - Nagtingkagol na sa bilanggoan sa Fuente Police Station ang usa ka 43-anyos nga amahan human gitudlo sa iyang 13-anyos nga anak nga milugos kaniya sulod na sa makadaghan nga higayon.
Ang amahan ug anak gikatahong nagpuyo sa Capitol Site, Cebu City ug giingon nga dugay na sab gibiyaan ang lalaki sa iyang live-in partner.
Kagahapon sa buntag midangop sa kapolisan ang 13-anyos nga bata kauban ang iyang lola human mireklamo nga siya gibun-og sa iyang amahan dihang nisukol kay gusto na sab unta nga hilabtan sa amahan.
Matud ni Chief Insp. Wildemar Tiu, hepe sa Fuente Police, nga nahinabi sa Banat News nga sumala pa sa bata nagsugod ang pagpang-abuso kaniya sa iyang amahan niadto pa’ng buwan sa Mayo.
Sumala pa ni Tiu nga human nagbuwag ang mag-live-in partner, sa balay sa iyang lola nagpuyo ang bata sulod sa lima ka tuig hangtud gikuha sa amahan niadtong Abril.
Ang amahan miangkon nga katapusan niya’ng nahilabtan ang iyang anak niadtong Septiyembre 3.
Gibutyag sa amahan nga mahimo niya ang pag-abuso sa iyang anak kung siya hubog nga maka-uli sa iyang balay.
“Kung makasweldo kuno unya mahubog siya, lagmit mahitabo kay tan-aw daw niya sa bata iyahang asawa,” matud ni Tiu.
Mag-atubang og kasong child abuse ug incestuous rape ang maong amahan. (BANAT NEWS)