Kanhi hepe sa PCR andam sa imbestigasyon

CEBU, Philippines – Kanhi hepe sa Police Community Relations (PCR) sa Police Regional Office 7, sa gipadayag ni Sr. Supt. Audie Villacin andam kini moatabang sa fact-finding investigation sa Regional Investigation and Detection Management Division 7 kalabot sa isyu nga usa niya ka kanhi staff ang gipasanginlang nangawkaw og kwarta alang sa mga biktima sa bagyong Yolanda.

Matud pa ni Villacin pinaagi sa interbyu sa telepono uban sa mga sakop sa media nga wala g’yud kini kasayuran sa maong hitabo.

Apan sumala ni Villacin nga dihang siya pa ang hepe sa RPCR duna sila’y mga proyekto nga gihimo alang sa mga biktima sa linog ug bagyong Yolanda apan ubos kini sa Regional Comptroller Division ug ang kwarta didto giagi sa maong buhatan.

Si SPO1 Evelyn Ligue ang imbestigador sa maong isyu mitug-an nga base sa nakuha nilang impormasyon ang Negros Oriental Provincial Police Office nakahatag og P39,000, Mandaue City Police Office mihatag sab og P5,000 para sa mga biktima sa linog ug P6,000 alang sa biktima sa Yolanda.

Samtang ang Lapu-Lapu City Police Office nakahatag ‘sab pinaagi sa ilang finance officer, diin mihimo sila og salary deduction nga tag P20 sa tanan nga sakop sa kapulisan sa Lapu-Lapu.

Ang uban pa nga buhatan mihatag ‘sab og tabang pinaagi sa cash or in kind, apan si Ligue miklaro nga ang pagkolekta sa mga naasoy nga data tipik ug kabahin lang sa ilang imbestigasyon.

Hangtod karon wala pa naklaro kung pila gayod nga kantidad sa salapi ang gikatahong nabulsa sa usa ka policewoman nga gipasanginlan. -/EIM) (BANAT NEWS)