Ulo sa masuso nalubag?

CEBU, Philippines – Naglaraw karon pagpasaka og kaso ang usa ka amahan batok sa  Vicente Sotto Memorial Medical Center human matud pa namatay ang iyang bag-ong gihimugso nga anak ug hapit na magbuwag ang ulo niini ug liog.

Si Renjie Torreon, 24 nga taga Sitio Upper Sampaguita sa Barangay Banilad dakbayan sa Mandaue  dili makadawat sa nahitabo sa ilang unang anak nga usa ka lalaki.

Matud pa ni Torreon nga niadtong alas-11 sa gabii sa Sabado nagbati ang iyang asawa nga si Antoniette Torreon ,28,  busa iya kining gidala ngadto sa Eversley Hospital and Sanitarium sa dakbayan sa Mandaue. Gumikan kay pre-mature man ang bata sanglit pito pa kini ka buwang gimabdos sa iyang asawa gitambagan sila pagbalhin ngadto sa VSMMC niana nang alas-3 sa kaadlawon niadtong Domingo. Matud pa ni Torreon nga nianang alas-5 na sa kaadlawon sa  Domingo niya nahibaw-an nga padung na manganak iyang asawa kay gidala na sa anakanan apan alas-6 sa gabii na siya gipatawag nga paadtoon sa information desk sa maong tambalanan ug diha pa siya gipahibawo nga patay ang gihimugso sa iyang asawa ug diretsong gihatag kaniya ang death certificate.

Ang dokumento matud pa nag-ingon nga namatay ang iyang anak alas 5:24  ug giingnan siya nga ipakuha sa morgue ang iyang anak.

“Ako diha ra g’yud gawas sa delivery room wa gyuy nagpahibawo nako nga nanganak na akong asawa nagdala-dala ra g’yud sa sinina sa bata, dili man sad gani to amo ang lampin nga gipustan sa bata pagkuha nako sa morgue,”matud pa ni Torreon.

Si Nonoy Mongaya ang tigpamaba sa VSMMC miingon nga patay nang daan ang maong bata sud pa lang sa tiyan sa inahan busa mipahigayon og emergency nga pagpa-anak si Dr. Charlene Asuncion Laplana  hinungdan nga maoy nakabutang sa death certificate sa maong bata nga “Intra Uterine  Fetal Death secondary to cord accident.”

Apan ang inahan sa maong bata nga si Antonietta mihimakak nga patay nang daan ang iyang anak gumikan kay nianang pagka-Sabado nagpa ultrasound pa siya ug buhi pa ang iyang anak.

Matud pa niini nga sa iyang paghidangat sa maong tambalanan wa dayoy nakaatiman niya busa sa dihang kagawason na ang iyang anak iyang gisuwayan na lang sa pag-utong ug dayon una pa siya giduol og nurse ug doktor.

Gumikan sa maong panghitabo, gipaubos karon sa awtopsiya ang bata didto sa Cebu Memorial Rolling Hills sa dakbayan sa Mandaue. -/EIM) (BANAT NEWS)