CEBU, Philippines – Gikatakda nga ipasar karong semanaha sa konseho sa dakbayan sa Mandaue ang ordinansahon sa pagtugot kang Mayor Jonas Cortes nga matukod ang City Anti-Illegal Fishing Task Force o Bantay Dagat.
Si Konsehal Jimmy Lumapas ang nangamahan sa maong ordinansahon kinsa mao usab ang chairman sa committee on market and agriculture sa konseho.
Si Lumapas nipasabot sa kamahinungdanon sa pagtukod sa task force nga maoy tahasan sa pagpanalipod sa kadagatan nga nahisakop sa dakbayan.
Nunot usab kini sa higpit nga pagbantay sa kadagatan sa sikbit nga mga lugar sa dakbayan nga naglakip sa dakbayan sa Lapu-Lapu ug Consolacion pinaagi usab sa pagtukod og bantay dagat niini.
Ang mga dapit sa dakbayan sa Mandaue nga may dakung bahin sa kadagatan mao ang barangay Labogon, Jagobiao ug Paknaan nga kinahanglan usab nga kapanalipdan batok sa ilegal nga pagpanagat.
Ang task force o bantay dagat langkuban sa 16 ka sakop nga rehistradong mananagat sa dakbayan ug ubanan sa kapolisan.
Ang kagamhanan mohatag og kahimanan sama sa patrol boat nga dumalahon sa kawani sa Mandaue City Agriculture’s Office. -/GMR) (BANAT NEWS)