CEBU, Philippines – Naundang ang disco sa barangay San Jose, Cebu City, atol sa kasaulogan sa fiesta sa maong lugar sa dihang usa ka polis ang giingong mipabuto sa iyang armas kagahapon sa kaadlawon.
Ang youth organizer sa maong lugar nga si Leslie Minoza mireklamo sa Talamban Police batok ni Police Officer One John Rodwell Oporto sakop sa Talamban Police Station.
Gituhoang ubos sa ilimnon nga makahubog ang maong polis dihang mipabuto kini sa iyang armas ug dali nga misakay og motorsiklo ug mipalayo sa maong lugar.
Ang hepe sa Talamban Police nga si Senior Inspector Bienvenido Miral nga nahinabi sa Banat News mitug-an nga gipa-report na si Oporto sa Cebu City Police Office tungod sa hitabo. Si Oporto dihang gikahinabi sa Banat News kusganong mihimakak sa pasangil kaniya. Matud niya dunay grupo sa mga batan-ong nagpatabang niya kay gipareglahan kini sa grupo sa usa ka fraternity.
Sumala pa ni Oporto nga sa dihang iyang giduol ang gireklamong grupo giingnan siya nila og: “ngano man diay og polis ka?” ug gi-aksyonan siya og hamag hinungdan nga nag-warning shot siya.
Sumala pa niya gibaharan pa siya sa grupo nga nanakay dayon og motor ug mipalayo sa lugar.
Gihimakak usab niya nga nahunong ang disco ug wala usab siya mobiya sa lugar human sa hitabo ug nipauli siya alas-3 na sa kaadlawon human sa disco.
Mihimo na og imbestigasyon ang Investigation Detection and Management Branch (IDMB) sa CCPO sa maong hitabo. -/EIM) (BANAT NEWS)