CEBU, Philippines - Gidakop sa Task Force Kalikasan sa dakbayan sa Lapu-Lapu ang tulo ka mananagat kinsa nigamit og dinamita kagahapon sa buntag didto sa barangay Pangan-an, isla sa Olango.
Si PO3 Kent Lisen ug ubang sakop sa TFK ang niresponde human nakadawat og tawag gikan sa usa ka residente sa barangay mahitungod sa daghang paggamit og ilegal nga pabuto sa dagat. Ang managsuong Ramilito Cabanday, 40-anyos ug Renato Cabanday, 52-anyos ang nadakpan sa kapolisan ug ilang paryente nga si Renero Siton, 39-anyos kinsa pulos lumad sa maong lugar.
Nasakmit sa kapolisan ang tulo ka baruto, duha ka botelya nga gisudlan og ammonium nitrate, tulo ka improvised fins, tulo ka goggles ug duha ka kilong isda. Si Lisen miingon nga ang mga ilegal nga pabuto nga gigamit sa mga suspetsado posibleng gikompra gikan sa Bohol.
Ang TFK naniid na sa mga suspetsado alas 10 pa sa gabii sa niaging Miyerkules.
Buntag na nasakpan ang tulo ka suspetsado nga niadto sa dagat ug nasakpan nila si Renato nga aktong nilabay sa dinamita ug nibuto sa dagat.
Nisuway pag-ikyas ang tulo ka suspetsado apan naabtan sila sa mga nirespondeng mga polis.
Ang tulo ka mananagat pasakaan og kasong kalapasan batok ilegal nga pagpanagat. (BANAT NEWS)