Mga tanod manglimpiyo sa Tejero creek

CEBU, Philippines - Magtinabangay sa pagpanglimpiyo ang mga tanod sa kabarangayan sa dakbayan sa Sugbo sa sapa sa barangay Tejero aron dili na moawas tungod sa mga sagbot.

Ang tanod coordinator sa dakbayan sa Sugbo nga si Samson Dasoc mibutyag kagahapon nga ang maong lakang “verbal instruction” sa mayor.

Kagahapon sa buntag ang mga hepe sa tanod gitigum ni Samson ug ang kabahin sa pagpanglimpiyo sa sapa sa Tejero karong Sabado ang ilang gihisgutan.

Ang pagpanglimpiyo sa sapa ug kanal diha sa barangay boluntaryo kini ug tanang tanod sa kabarangayan sa siyudad ang giawhag sa pagsalmot sa maong bayanihan.

Karong Sabado maoy ikatulong higayon nga ang mga tanod manglimpiyo sa sapa sa Tejero. Ang unang higayon niadtong Agosto 26 nga gisalmutan sa sobra sa 100 ka tanod gikan sa 13 ka barangay.

Gipasabot ni Dasoc nga ang Tejero maoy ilang “pilot area” ug isunod usab nila ang ubang barangay.

Matud ni Dasoc nga nagplano siya sa pag-organize sa mga residente duol sa sapa aron motabang og bantay sa mga magpataka og labay sa basura.

Gibutyag ni Dasoc nga dunay opisyal sa barangay ang mitambong sa tigum kagahapon sa mayor’s conference room.

 Subay niini, ang kagawad sa barangay Tejero nga si  Garry Lao kinsa maoy chairman sa committee onsite  nagkanayon nga wala sila’y nadawat nga “formal communication” gikan sa City Hall sa mao nilang kalihukan diha sa ilang barangay.

“The Barangay Tejero is willing and able to coordinate and to cooperate with the Cebu City government on environmental concerns such as cleaning the creek and de-clogging drainage but way equipment nga magamit,” ni Lao pa.

Ang maong pagmano-mano og limpiyo sa sapa diha sa lugar usa lang kini ka “band aid solution” matud sa kagawad.

Hinuon si Dasoc nagkanayon nga nagplano siyang mohangyo og backhoe nga mokubkub sa mga sagbot ug lapok sa sapa.

Subling gipadayag sa kagawad nga andam silang motabang sa gihimo sa siyudad diha sa ilang barangay apan nagkinahanglan usab nga pahibaw-on sila o adunay formal communication.

Dugang ni Lao nga quarterly o matag tulo ka buwan dunay ipahigayong clean-up drive ang Cebu City Coastal Management Board diin ang Tejero miyembro niini. (BANAT NEWS)