Drug lords sa bukiran gi-monitor

CEBU, Philippines - Gi-monitor sa kapolisan ang upat ka tawo nga gikatahong mga drug lords sa bukirang bahin sa dakbayan sa Sugbo human sa pagkasikop sa gikatahong level 3 drug pusher sa barangay Pit-os kagahapon.

Matud sa hepe sa City Intelligence Branch, Supt. Romeo Santander, nga gawas ni Dante Gerona nga nasikop sa mga sakop sa Regional Anti-Illegal Drugs Special Operations Task Force (RAIDSOTF) padayon nga gipanid-an nila ang tulo hangtud sa upat ka tawo nga nag-operate sa bukirang bahin sa dakbayan. Sumala pa ni Santander nga dunay dili momenos sa tulo hangtod sa lima ka mga drug pushers nga nag-operate sa mga bukirang barangay sa dakbayan.

Ang maong mga drug personalities padayon pa nila nga gi-monitor karon ug ang ilang mga kalihukan.

Apan bisan pa man sa kadaghan sa mga nasakmit nga shabu sa dakbayan, si Santander miingon nga wala pa sila’y nakit-an nga shabu laboratory. Hinuon wa’y kompiyansa ang hepe sa CIB tungod kay matud pa basin malutsan sila hinungdan nga gihingusgan pa gyud niya ang ilang intelligence ug surveillance operation.

Ang Cebu City Police Office mao ang nag-una sa kampanya sa ilegal nga drugas sa Central Visayas sa pagkasakmit sa kapin sa P11 milyones nga balor sa shabu.

Samtang ang Police Regional Office-7 mao ang nag-una sa kampanya batok sa ilegal nga drugas sa tibuok nasud ug ikaduha sa kampanya sa pagsikop sa mga tawo nga naghupot og armas nga wala’y lisensya. (BANAT NEWS)