CEBU, Philippines – Human sa pasahay sa basol kong kinsay sad-an kon nganong hangtud karon wala pa maimplimentar ang drainage project sa dakbayan sa Sugbo ang executive department gikatakdang moduso na lang og laing dokumento aron maimplimentar na ang nahisgutang proyekto.
Sa milabay’ng sesyon sa siyudad si Konsehal Margarita Osmeña sa iyang privilege speech mibutyag nga ang nahisgutang proyekto niadto pa kining tuig 2012 ug aduna nay nagahin nga pundo niini apan gipasanginlan silang wala mosuporta sa proyekto. Si Dr. Lucille Mercado, Cebu City administrator nagkanayon nga duna na sila’y nadusong dokumento aron maimplementar na ang proyekto apan posibleng sa kadaghan sa dokumentong naduso ngadto sa konseho nga dugay naatiman nataligam-an na kini. “To stop pushing back around mo-submit na lang ‘ta og balik….Actually sa tinuod ang drainage wala pa gyud siya nalihok kinahanglan man gud ipa-bid nimo before you can start unsaon man nimo kung wala pay approval di gyud na ma-bid,” ni Mercado pa. Gipasabot ni Mercado nga ang pag-aproba sa budget sa proyekto ubos kini sa lump sum o tingub hinungdang matag specific area sa proyekto nga tibhangan sa budget ipananghid pa nila ngadto sa konseho. - /EIM) (BANAT NEWS)